−−−−⏑−−,⏑⏑⏑⏑⏑⏑−,−⏑−−⏑−−
Evaṁ Laṅkāya nātho hitam-amitamatī āyatiṁ pekkhamāno

−−−−⏑−−⏑⏑⏑⏑⏑⏑−,−⏑−−⏑−−
tasmiṁ kālamhi Laṅkāsurabhujagagaṇādīnam-atthaṁ ca passaṁ

−−−−⏑−−,⏑⏑⏑⏑⏑⏑−,−⏑−−⏑−−
āgā tikkhattum-etaṁ ativipuladayo lokadīpo sudīpaṁ

−−−−⏑−−,⏑⏑⏑⏑⏑⏑−,−⏑−−⏑−−
dīpo tenāyam-āsī sujanabahumato dhammadīpāvabhāsī ti.

⏑−⏑−¦⏑⏑⏑⏑¦−⏑−⏑−
Tathāgato sakalaguṇaggataṁ gato

⏑−⏑−¦⏑⏑⏑⏑¦−⏑−⏑−
aniccatāvasam-avaso upāgato:

⏑−⏑−¦⏑⏑⏑⏑¦−⏑−⏑−
itīdha yo bhayajananiṁ aniccataṁ,

⏑−⏑−¦⏑⏑⏑⏑¦−⏑−⏑−
avekkhate, sa bhavati dukkhapārago ti.

−−⏑−¦⏑⏑⏑−⏑⏑¦−⏑−−
Therā pi te matipadīpahatandhakārā

−−⏑−¦⏑⏑⏑−⏑⏑¦−⏑−−
lokandhakārahananamhi mahāpadīpā

−−⏑−¦⏑⏑⏑−⏑⏑¦−⏑−−
nibbāpitā maraṇaghoramahānilena:

−−⏑−¦⏑⏑⏑−,⏑⏑¦−⏑−−
tenāpi jīvitamadaṁ matimā jaheyyā ti.

⏑⏑⏑⏑⏑⏑−−,−⏑−−⏑−−
Iti paramamatīnaṁ pattipattabbakānaṁ

⏑⏑⏑⏑⏑⏑−−,−⏑−−⏑−−
tibhavahitakarānaṁ lokanāthorasānaṁ

⏑⏑⏑⏑⏑⏑−−,−⏑−−⏑−−
sumariya maraṇaṁ taṁ saṁkhatāsārakattaṁ

⏑⏑⏑⏑⏑⏑−−,−⏑−−⏑−−
parigaṇiyamasesaṁ appamatto bhaveyyā ti.

−−−−,−⏑⏑−−⏑⏑−−
Hitvā seṭṭhaṁ brahmavimānaṁ pi manuññaṁ

−−−−,−⏑⏑−⏑⏑⏑−−
jegucchaṁ so sāsanahetu naralokaṁ

−−−−,−⏑⏑−−⏑⏑−−
āgammākā sāsanakiccaṁ katakicco,

−−−−,−⏑⏑−−⏑⏑−−
ko nāmañño sāsanakiccamhi pamajje? ti

−−−,⏑⏑⏑⏑−⏑−⏑−−
Laṅkāyaṁ Vijayasanāmako kumāro

−−−,⏑⏑⏑⏑−⏑−⏑−−
otiṇṇo thiramati Tambapaṇṇidese

−−−,⏑⏑⏑⏑−⏑−⏑−−
sālānaṁ yamakaguṇānam-antarasmiṁ

−−−,⏑⏑⏑⏑−⏑−⏑−−
nibbātuṁ sayitadine tathāgatassā ti.

−−⏑−¦⏑⏑⏑−,⏑⏑¦−⏑−−
Hitvāna pubbacaritaṁ visamaṁ samena

−−⏑−¦⏑⏑⏑−,⏑⏑¦−⏑−−
dhammena Laṅkam-akhilaṁ anusāsamāno

−−⏑−¦⏑⏑⏑−,⏑⏑¦−⏑−−
so Tambapaṇṇinagare Vijayo narindo

−−⏑−¦⏑⏑⏑−,⏑⏑¦−⏑−−
rajjaṁ akārayi samā khalu aṭṭhatiṁsā ti.

⏑−⏑−¦−⏑⏑¦−⏑−⏑−
Subhaddakaccānam-anomarūpiniṁ

⏑−⏑−¦−⏑⏑¦−⏑−⏑−
mahesibhāve abhiseciyattano

⏑−⏑−¦−⏑⏑¦−⏑−⏑−
sahāgatā tāya padāya attanā

⏑−⏑−¦−⏑⏑¦−⏑−⏑−
sahāgatānaṁ vasi bhūmipo sukhaṁ ti.

−−⏑−¦−⏑⏑¦−⏑−−
Tasmiṁ matasmiṁ manujādhipasmiṁ

−−⏑−¦−⏑⏑¦−⏑−−
sabbe samāgamma narindaputtā

−−⏑−¦−⏑⏑¦−⏑−−
tassābhayassābhayadassa bhātu

−−⏑−¦−⏑⏑¦−⏑−−
rājābhisekaṁ akaruṁ uḷāraṁ ti.

−−⏑−¦⏑⏑⏑−⏑⏑¦−⏑−−
So Paṇḍukābhayamahīpati sattatiṁsa-

−−⏑−¦⏑⏑⏑−,⏑⏑¦−⏑−−
vassodhigamma dhitimā dharaṇīpatittaṁ

−−⏑−¦⏑⏑⏑−⏑⏑¦−⏑−−
ramme anūnam-Anurādhapure samiddhe

−−⏑−¦⏑⏑⏑−⏑⏑¦−⏑−−
vassāni sattati akārayi rajjam-etthā ti.

−−−,⏑⏑⏑⏑−⏑−⏑−−
Vesākhe narapati puṇṇamāyam-evaṁ

−−−,⏑⏑⏑⏑−⏑−⏑−−
devānaṁpiyavacanopagūḷhanāmo

−−−,⏑⏑⏑⏑−⏑−⏑−−
Laṅkāyaṁ pavitatapīti-ussavāyaṁ

−−−,⏑⏑⏑⏑−⏑−⏑−−
attānaṁ janasukhadobhisecayī so ti.

⏑−⏑−¦−⏑⏑¦−⏑−⏑−
Mahādayassāpi jinassa kaḍḍhanaṁ

⏑−⏑−¦−⏑⏑¦−⏑−⏑−
vihāya pattaṁ amataṁ sukhaṁ pi te

⏑−⏑−¦−⏑⏑¦−⏑−⏑−
kariṁsu lokassa hitaṁ tahiṁ tahiṁ:

⏑−⏑−¦−⏑⏑¦−⏑−⏑−
bhaveyya ko lokahite pamādavā? ti

−−⏑−¦⏑⏑⏑−⏑⏑¦−⏑−−
Laṅkāpasādanaguṇena viyākato so

−−⏑−¦⏑⏑⏑−,⏑⏑¦−⏑−−
Laṅkāhitāya muninā sayitena ante

−−⏑−¦⏑⏑⏑−,⏑⏑¦−⏑−−
Laṅkāya satthusadiso hitahetu tassā

−−⏑−¦⏑⏑⏑−⏑⏑¦−⏑−−
Laṅkāmarūhi mahitobhinisīdi tatthā ti.

−−−−−,−⏑−−⏑−−
Laṅkādīpe so satthukappo akappo

−−−−−,−⏑−−⏑−−
Laṅkādhiṭṭhāne dvīsu ṭhānesu thero

−−−−−,−⏑−−⏑−−
dhammaṁ bhāsitvā dīpabhāsāya evaṁ

−−−−−,−⏑−−⏑−−
saddhammotāraṁ kārayī dīpadīpo ti.

−−−,⏑⏑⏑⏑−⏑−⏑−−
Devānaṁpiyavacanopagūḷhanāmo

−−−,⏑⏑⏑⏑−⏑−⏑−−
Laṅkāyaṁ paṭhamam-imaṁ Mahāvihāraṁ

−−−,⏑⏑⏑⏑−⏑−⏑−−
rājā so sumati Mahāmahindatheraṁ

−−−,⏑⏑⏑⏑−⏑−⏑−−
āgammāmalamatim-ettha kārayitthā ti.

−⏑⏑−¦⏑⏑−¦⏑⏑−−
Devamanussagaṇā gaṇinaṁ taṁ

−⏑⏑−¦⏑⏑−¦⏑⏑−−
taṁ ca gaṇaṁ guṇavitthatakittiṁ

−⏑⏑−¦⏑⏑−¦⏑⏑−−
yānam-upecca ca mānayamānā

−⏑⏑−¦⏑⏑−¦⏑⏑−−
puññacayaṁ vipulaṁ akariṁsū ti.

⏑⏑−⏑⏑¦−⏑−⏑−−
Sakadhātusarīrakena cevaṁ

⏑⏑−−⏑⏑¦−⏑−⏑−−
parinibbāṇagato pi lokanātho

⏑⏑−⏑⏑¦−⏑−⏑−−
janatāya hitaṁ sukhaṁ ca sammā

⏑⏑−−⏑⏑¦−⏑−⏑−−
bahudhākāsi ṭhite jine kathā kā? ti

⏑⏑⏑⏑⏑⏑¦−⏑−⏑−−
Iti Kusumapure sare saraṁsā

⏑⏑⏑⏑−⏑⏑¦−⏑−⏑−−
bahuvidhacārudhajākulā visālā

⏑⏑⏑⏑⏑⏑¦−⏑−⏑−−
surucirapavarorubodhipūjā

⏑⏑⏑⏑−⏑⏑¦−⏑−⏑−−
marunaracittavikāsinī ahosī ti.

−−−−,−⏑⏑−−⏑⏑−−
Evaṁ Laṅkālokahitaṁ sāsanavuddhiṁ

−−−−,−⏑⏑−−⏑⏑−−
saṁsādhento esa mahābodhidumindo

−−−−,−⏑⏑−−⏑⏑−−
Laṅkādīpe rammamahāmeghavanasmiṁ

−−−−,−⏑⏑−−⏑⏑−−
aṭṭhā dīghaṁ kālam-anekabbhutayutto ti.

−−−⏑⏑−⏑−,⏑⏑⏑−−−⏑−−⏑−
Taṁ etaṁ atisāhasaṁ atibalaṁ nāvāriyaṁ yo naro

−−−⏑⏑−⏑−,⏑⏑⏑−−−⏑−−⏑−
jānanto pi aniccataṁ bhavagate nibbindate neva ca

−−−⏑⏑−⏑−,⏑⏑⏑−−−⏑−−⏑−
nibbiṇṇo viratiṁ ratiṁ na kurute pāpehi puññehi ca

−−−⏑⏑−⏑−,⏑⏑⏑−−−⏑−−⏑−
- tassesā atimohajālabalatā - jānaṁ pi sammuyhatī ti.

⏑⏑⏑⏑⏑⏑−−,−⏑−−⏑−−
Agatigamanadosā muttamattena eso

⏑⏑⏑⏑⏑⏑−−,−⏑−−⏑−−
anupahatakudiṭṭhī pīdisiṁ pāpuṇiddhiṁ,

⏑⏑⏑⏑⏑⏑−−,−⏑−−⏑−−
agatigamanadosaṁ suddhadiṭṭhī samāno

⏑⏑⏑⏑⏑⏑−−,−⏑−−⏑−−
katham-idha hi manusso buddhimā no jaheyyā ti.

⏑−⏑−¦−⏑⏑¦−⏑−⏑−
Calācalāyaṁ gatiyaṁ hi pāṇino

⏑−⏑−¦−⏑⏑¦−⏑−⏑−
upenti puññena yathāruciṁ gatiṁ,

⏑−⏑−¦−⏑⏑¦−⏑−⏑−
itīti mantvā satataṁ mahādaro

⏑−⏑−¦−⏑⏑¦−⏑−⏑−
bhaveyya puññūpacayamhi buddhimā ti.

⏑⏑⏑⏑⏑⏑¦−⏑−⏑−
Iti sucaritajātam-abbhutaṁ

⏑⏑⏑⏑−⏑⏑¦−⏑−⏑−
suṇiya naro matimā sukhattiko

⏑⏑⏑⏑⏑⏑¦−⏑−⏑−
akusalapathato paraṁmukho

⏑⏑⏑⏑−⏑⏑¦−⏑−⏑−
kusalapathebhirameyya sabbadā ti.

⏑⏑−⏑¦⏑−⏑⏑¦−⏑⏑−
Iti veram-anekavikappacitaṁ

⏑⏑−⏑¦⏑−⏑⏑¦−⏑⏑−
samayanti bahuṁ api sappurisā:

⏑⏑−⏑¦⏑−⏑⏑¦−⏑⏑−
iti cintiya ko hi naro matimā

⏑⏑−⏑¦⏑−⏑⏑¦−⏑⏑−
na bhaveyya paresu susantamano ti.

−−−−⏑−−,⏑⏑⏑⏑⏑⏑−,−⏑−−⏑−−
Ete te nekakoṭī idha manujagaṇe ghātite cintayitvā

−−−−⏑−−,⏑⏑⏑⏑⏑⏑−,−⏑−−⏑−−
kāmānaṁ hetu etaṁ manasi ca kayirā sādhu ādīnavaṁ taṁ

−−−−⏑−−,⏑⏑⏑⏑⏑⏑−,−⏑−−⏑−−
sabbesaṁ ghātaniṁ taṁ manasi ca kayirāniccataṁ sādhu sādhu

−−−−⏑−−,⏑⏑⏑⏑⏑⏑−,−⏑−−⏑−−
evaṁ dukkhā pamokkhaṁ subhagatim-athavā pāpuṇeyyācirenā ti.

−−⏑−¦⏑⏑⏑−⏑⏑¦−⏑−−
Bhogā dasaḍḍhavidhadosavidūsitā pi

−−⏑−¦⏑⏑⏑−⏑⏑¦−⏑−−
paññāvisesasahitehi janehi pattā

−−⏑−¦⏑⏑⏑−⏑⏑¦−⏑−−
honteva pañcaguṇayogagahītasārā:

−−⏑−¦⏑⏑⏑−,⏑⏑¦−⏑−−
iccassa sāragahaṇe matimā yateyyā ti.

−−−,⏑⏑⏑⏑−⏑−⏑−−
Nissāre dhananicaye visesasāraṁ

−−−,⏑⏑⏑⏑−⏑−⏑−−
ye dānaṁ parigaṇayanti sādhupaññā,

−−−,⏑⏑⏑⏑−⏑−⏑−−
te dānaṁ vipulam-apetacittasaṅgā

−−−,⏑⏑⏑⏑−⏑−⏑−−
sattānaṁ hitaparamā dadanti evaṁ ti.

−−⏑−¦⏑⏑⏑−⏑⏑¦−⏑−−
Khedaṁ pi kāyajam-asayham-acintayitvā

−−⏑−¦⏑⏑⏑−⏑⏑¦−⏑−−
puññaṁ pasannamanasopacitaṁ hi evaṁ

−−⏑−¦⏑⏑⏑−⏑⏑¦−⏑−−
sādheti sādhanasatāni sukhākarāni:

−−⏑−¦⏑⏑⏑−,⏑⏑¦−⏑−−
tasmā pasannamanaso va kareyya puññaṁ ti.

−−⏑−¦⏑⏑⏑−,⏑⏑¦−⏑−−
Evaṁ pasannamatimā ratanattayamhi

−−⏑−¦⏑⏑⏑−,⏑⏑¦−⏑−−
cāgādhimuttamanasā janatāhitena

−−⏑−¦⏑⏑⏑−,⏑⏑¦−⏑−−
lokatthasiddhi paramā bhavatī ti ñatvā

−−⏑−¦⏑⏑⏑−⏑⏑¦−⏑−−
saddhādinekaguṇayogaratiṁ kareyyā ti.

−−−⏑⏑−⏑−⏑⏑⏑−−−⏑−−⏑−
Tiṭṭhantaṁ sugataṁ ca pūjiyatamaṁ lokuttamaṁ nittamaṁ

−−−⏑⏑−⏑−,⏑⏑⏑−−−⏑−−⏑−
dhātū cassa vicuṇṇitā janahitaṁ āsiṁsatā pūjiya

−−−⏑⏑−⏑−⏑⏑⏑−−−⏑−−⏑−
puññaṁ taṁ samam-iccavecca matimā saddhāguṇālaṁkato

−−−⏑⏑−⏑−⏑⏑⏑−−−⏑−−⏑−
tiṭṭhantaṁ sugataṁ viyassa munino dhātuṁ ca saṁpūjaye ti.

−−⏑−¦⏑⏑⏑−⏑⏑¦−⏑−−
Puññāni evam-amalāni sayaṁ ca santo

−−⏑−¦⏑⏑⏑−⏑⏑¦−⏑−−
kubbanti sabbavibhavuttamapattihetu

−−⏑−¦⏑⏑⏑−,⏑⏑¦−⏑−−
kārenti cāpi hi pare parisuddhacittā

−−⏑−¦⏑⏑⏑−,⏑⏑¦−⏑−−
nānāvisesajanatāparivārahetū ti.

−−−,⏑⏑⏑⏑−⏑−⏑−−
Evaṁ yo kusalaparo karoti puññaṁ

−−−,⏑⏑⏑⏑−⏑−⏑−−
chādento aniyatapāpakaṁ bahuṁ pi,

−−−,⏑⏑−⏑⏑−⏑−⏑−−
so saggaṁ sagharam-ivopayāti, tasmā

−−−,⏑⏑⏑⏑−⏑−⏑−−
sappañño satatarato bhaveyya puññe ti.

⏑⏑⏑⏑⏑⏑¦−⏑−⏑−−
Iti parahitam-attano hitaṁ ca

⏑⏑⏑⏑−⏑⏑¦−⏑−⏑−−
paṭilabhiyissariyaṁ karoti pañño

⏑⏑⏑⏑⏑⏑¦−⏑−⏑−−
vipulam-api kubuddhi laddhabhogaṁ

⏑⏑⏑⏑−⏑⏑¦−⏑−⏑−−
ubhayahitaṁ na karoti bhogaluddho ti.

⏑⏑⏑⏑⏑⏑−−,−⏑−−⏑−−
Iti vibhavam-anappaṁ sādhupaññā labhitvā

⏑⏑⏑⏑⏑⏑−−,−⏑−−⏑−−
vigatamadapamādā cattakāmappasaṅgā

⏑⏑⏑⏑⏑⏑−−,−⏑−−⏑−−
akariya janakhedaṁ puññakammābhirāmā

⏑⏑⏑⏑⏑⏑−−,−⏑−−⏑−−
vipulavividhapuññaṁ suppasannā karontī ti.

−−⏑−¦−⏑⏑¦−⏑−−
Evaṁ asārehi dhanehi sāraṁ

−−⏑−¦−⏑⏑¦−⏑−−
puññāni katvāna bahūni paññā

−−⏑−¦−⏑⏑¦−⏑−−
ādenti, bālā pana kāmahetu

⏑−⏑−¦−⏑⏑¦−⏑−−
bahūni pāpāni karonti mohā ti.

⏑⏑⏑⏑⏑⏑¦−⏑−⏑−−
Iti ‘bahuvidhapuññahetubhūtā

⏑⏑⏑⏑−⏑⏑¦−⏑−⏑−−
narapatitā bahupāpahetu cā’ ti

⏑⏑⏑⏑⏑⏑¦−⏑−⏑−−
madhuram-iva visena missam-annaṁ

⏑⏑⏑⏑−⏑⏑¦−⏑−⏑−−
sujanamano bhajate na taṁ kadācī ti.