Jaccandhavaggo chaṭṭho.

6-8: Gaṇikāsuttaṁ (58)

1. evaṁ me sutaṁ:
ekaṁ samayaṁ bhagavā rājagahe viharati, veḷuvane kalandakanivāpe. tena kho pana samayena rājagahe dve pūgā aññatarissā gaṇikāya sārattā honti paṭibaddhacittā. BJT note: paṭibandhacittā-ti pi - commentary. bhaṇḍanajātā kalahajātā vivādāpannā aññam-aññaṁ pāṇihi pi upakkamanti, leḍḍūhi pi upakkamanti, daṇḍehi pi upakkamanti, satthehi pi upakkamanti. te tattha maraṇam-pi nigacchanti, maraṇamattam-pi dukkhaṁ.

atha kho sambahulā bhikkhū pubbanhasamayaṁ nivāsetvā, pattacīvaram-ādāya, rājagahaṁ piṇḍāya pavisiṁsu. rājagahe piṇḍāya caritvā, pacchābhattaṁ piṇḍapātapaṭikkantā, yena bhagavā tenupasaṅkamiṁsu, upasaṅkamitvā bhagavantaṁ abhivādetvā, ekamantaṁ nisīdiṁsu. ekamantaṁ nisinnā kho te bhikkhū bhagavantaṁ etad-avocuṁ: “idha bhante rājagahe dve pūgā aññatarissā gaṇikāya sārattā paṭibaddhacittā bhaṇḍanajātā kalahajātā vivādāpannā aññam-aññaṁ pāṇihi pi upakkamanti, leḍḍūhi pi upakkamanti, daṇḍehi pi upakkamanti, satthehi pi upakkamanti, te tattha maraṇam-pi nigacchanti, maraṇamattam-pi dukkhan”-ti.

3. atha kho bhagavā etam-atthaṁ viditvā, tāyaṁ velāyaṁ imaṁ udānaṁ udānesi:

[BJT Page 274]

“yañ-ca pattaṁ yañ-ca pattabbaṁ - ubhayam-etaṁ rajānukiṇṇaṁ āturassānusikkhato. ye ca sikkhāsārā sīlabbatajīvitabrahmacariyaupaṭṭhānasārā BJT note: sīlabbataṁ jīvitaṁ brahmacariyaṁ upaṭṭhānaṁ - printed edition of the commentary. upaṭṭhānasāro - printed edition of the text. - ayam-eko anto. ye ca evaṁvādino: ‘natthi kāmesu doso’ ti - ayaṁ dutiyo anto. iccete ubho antā kaṭasivaḍḍhanā, kaṭasiyo diṭṭhiṁ vaḍḍhenti. ete te ubho ante anabhiññāya olīyanti eke atidhāvanti eke. ye ca kho te abhiññāya tatra ca nāhesuṁ tena ca na maññiṁsu - vaṭṭaṁ tesaṁ natthi paññāpanāyā” ti.

last updated: March 2006