Pāṭaligāmiyavaggo aṭṭhamo.

8-1: Paṭhamanibbānasuttaṁ (71)

[BJT Page 290]

1. evaṁ me sutaṁ:
ekaṁ samayaṁ bhagavā sāvatthiyaṁ viharati, jetavane anāthapiṇḍikassa ārāme. tena kho pana samayena bhagavā bhikkhū nibbānapaṭisaṁyuttāya dhammiyā kathāya sandasseti samādapeti samuttejeti sampahaṁseti. te ca bhikkhū aṭṭhī katvā BJT note: aṭṭhikatvā - palm leaf book. manasikatvā, sabbaṁ cetaso BJT note: sabbacetaso - is another reading. samannāharitvā, ohitasotā dhammaṁ suṇanti.

2. atha kho bhagavā etam-atthaṁ viditvā, tāyaṁ velāyaṁ imaṁ udānaṁ udānesi:

“atthi bhikkhave tad-āyatanaṁ, yattha neva paṭhavī, na āpo, na tejo, na vāyo, na ākāsānañcāyatanaṁ, na viññānañcāyatanaṁ, na ākiñcaññāyatanaṁ, na nevasaññānāsaññāyatanaṁ, nāyaṁ loko, na paraloko, na ubho candimasuriyā. tatrāpāhaṁ bhikkhave neva āgatiṁ vadāmi, na gatiṁ, na ṭhitiṁ, na cutiṁ, na upapattiṁ. appatiṭṭhaṁ appavattaṁ anārammaṇam-evetaṁ - esevanto dukkhassā” ti.

last updated: March 2006