Itivuttakapāḷi

1. 2. 9. Saṅghasāmaggisuttaṁ (19)

[BJT Page 336]

vuttaṁ hetaṁ bhagavatā, vuttam-arahatā ti me sutaṁ:

“ekadhammo bhikkhave loke uppajjamāno uppajjati bahujanahitāya bahujanasukhāya bahuno janassa atthāya hitāya sukhāya devamanussānaṁ. katamo ekadhammo? saṅghasāmaggi. saṅghe kho pana bhikkhave samagge na ceva aññam-aññaṁ bhaṇḍanāni honti, na ca aññam-aññaṁ paribhāsā honti, na ca aññam-aññaṁ parikkhepā honti, na ca aññam-aññaṁ pariccajanā honti. tattha appasannā ceva pasīdanti pasannānañ-ca bhiyyobhāvo hotī” ti.

etam-atthaṁ bhagavā avoca, tatthetaṁ iti vuccati:

⏑−−−¦⏑−−−¦¦⏑−−−¦⏑−⏑−
“sukhā saṅghassa sāmaggi samaggānañcanuggaho,

⏑−⏑⏑¦−−−−¦¦−−−−¦⏑−⏑−  mavipulā Metre: Line c has an unexpected short syllable in 4th position.
samaggarato dhammaṭṭho yogakkhemā na dhaṁsati,

−−⏑−¦−−−−¦¦−−−−¦⏑−⏑− mavipulā
saṅghaṁ samaggaṁ katvāna kappaṁ saggamhi modatī” ti. [1]

ayam-pi attho vutto bhagavatā, iti me sutan-ti.

 

last updated: August 2007