Itivuttakapāḷi

1. 2. 10. Paduṭṭhapuggalasuttaṁ (20)

vuttaṁ hetaṁ bhagavatā, vuttam-arahatā ti me sutaṁ:

“idāhaṁ bhikkhave ekaccaṁ puggalaṁ paduṭṭhacittaṁ evaṁ cetasā ceto paricca pajānāmi: “imamhi cāyaṁ samaye puggalo kālaṁ kareyya, yathā bhataṁ nikkhitto, evaṁ niraye. taṁ kissa hetu? cittañ-hissa bhikkhave paduṭṭhaṁ. cetopadosahetu kho pana bhikkhave evam-idhekacce sattā kāyassa bhedā param-maraṇā apāyaṁ duggatiṁ vinipātaṁ nirayaṁ upapajjantī” ti.

etam-atthaṁ bhagavā avoca, tatthetaṁ iti vuccati:

⏑−⏑−¦−−−−¦¦−−−⏑¦⏑−⏑− mavipulā
“paduṭṭhacittaṁ ñatvāna ekaccaṁ idha puggalaṁ,

−⏑−−¦⏑−−−¦¦−−−−¦⏑−⏑−
etam-atthañ-ca vyākāsi buddho bhikkhūna' santiko. [1]

⏑−⏑−¦−⏑⏑−¦¦−−−−¦⏑−⏑− bhavipulā
imamhi cāyaṁ samaye kālaṁ kayirātha puggalo,

⏑⏑−⏑¦⏑−−−¦¦−−−⏑¦⏑−⏑−
nirayaṁ upapajjeyya cittañ-hissa padūsitaṁ. [2]

[BJT Page 336]

⏑−⏑−−¦−⏑−−¦¦−⏑−⏑¦⏑−⏑− 9 syllables
yathā haritvā nikkhipeyya evam-eva tathāvidhā,

−−⏑−¦⏑−⏑−¦¦−−−−¦⏑−⏑− Anuṭṭhubha
cetopadosahetu hi sattā gacchanti duggatin”-ti. [3]

ayam-pi attho vutto bhagavatā, iti me sutan-ti.

Vaggo dutiyo

tassuddānaṁ:

Moho Kodho atha Makkho Avijjā Taṇhā Sekhā duve,
Bhedo Sāmaggi Puggalo ca vaggam-āhu dutiyan-ti vuccati.

last updated: August 2007