Itivuttakapāḷi

Tatiyo vaggo

1. 3. 1. Pasannacittasuttaṁ (21)

vuttaṁ hetaṁ bhagavatā, vuttam-arahatā ti me sutaṁ:

“idāhaṁ bhikkhave ekaccaṁ puggalaṁ pasannacittaṁ evaṁ cetasā ceto paricca pajānāmi: “imamhi cāyaṁ samaye puggalo kālaṁ kareyya yathā bhataṁ nikkhitto evaṁ sagge. taṁ kissa hetu? cittañ-hissa bhikkhave pasannaṁ. cetopasādahetu kho pana bhikkhave evam-idhekacce sattā kāyassa bhedā param-maraṇā sugatiṁ lokaṁ upapajjantī” ti.

etam-atthaṁ bhagavā avoca, tatthetaṁ iti vuccati:

⏑−⏑−¦−−−−¦¦−−−⏑¦⏑−⏑−  mavipulā
“pasannacittaṁ ñatvāna ekaccaṁ idha puggalaṁ,

−⏑−−¦⏑−−−¦¦−−−−¦⏑−⏑−
etam-atthaṁ ca vyākāsi buddho bhikkhūna' santike. [1]

⏑−⏑−¦−⏑⏑−¦¦−−−−¦⏑−⏑−  bhavipulā
imamhi cāyaṁ samaye kālaṁ kayirātha puggalo,

⏑⏑−⏑¦⏑−−−¦¦−−−⏑¦⏑−⏑−
sugatiṁ upapajjeyya cittañ-hissa pasāditaṁ. [2]

⏑−⏑−−¦−⏑−−¦¦−⏑−⏑¦⏑−⏑− 9 syllables
yathā haritvā nikkhipeyya evam-eva tathāvidho,

−−⏑−¦⏑−⏑−¦¦−−−−¦⏑−⏑−  Anuṭṭhubha
cetopasādahetu hi sattā gacchanti suggatin”-ti. [3]

ayam-pi attho vutto bhagavatā, iti me sutan-ti

 

last updated: August 2007