Itivuttakapāḷi

2. 1. 4. Atapanīyasuttaṁ (31)

[BJT Page 352]

vuttaṁ hetaṁ bhagavatā, vuttam-arahatā ti me sutaṁ:

“dve me bhikkhave atapanīyā. katame dve? idha bhikkhave ekacco katakalyāṇo hoti katakusalo katabhīruttāno, akatapāpo akataḷuddo akatakibbiso. so “kataṁ me kalyāṇan”-ti pi na tappati, “akataṁ me pāpan”-ti pi na tappati. ime kho bhikkhave dve dhammā atapanīyā” ti.

etam-atthaṁ bhagavā avoca, tatthetaṁ iti vuccati:

−⏑−⏑¦⏑−−−¦¦⏑−−⏑¦⏑−⏑−
“kāyaduccaritaṁ hitvā vacīduccaritāni ca,

⏑−−⏑¦⏑−−−¦¦−−−−¦⏑−⏑−
manoduccaritaṁ hitvā yañ-caññaṁ dosasañhitaṁ. [1]

⏑−−⏑¦⏑−−−¦¦−−⏑⏑¦⏑−⏑−
akatvākusalaṁ kammaṁ katvāna kusalaṁ bahuṁ,

−−⏑−¦−−−−¦¦−−−⏑¦⏑−⏑− mavipulā
kāyassa bhedā sappañño saggaṁ so upapajjatī” ti. BJT Note: sopapajjati - ChS. [2]

ayam-pi attho vutto bhagavatā, iti me sutan-ti.

 

last updated: August 2007