Itivuttakapāḷi
3. 2. 2. Cakkhusuttaṁ (61)
vuttaṁ hetaṁ bhagavatā, vuttam-arahatā ti me sutaṁ:
“tīṇimāni bhikkhave cakkhūni. katamāni tīṇi? maṁsacakkhu, dibbacakkhu, paññācakkhū” ti. imāni kho bhikkhave tīṇi cakkhūnī” ti.
etam-atthaṁ bhagavā avoca, tatthetaṁ iti vuccati:
“maṁsacakkhu dibbacakkhu paññācakkhu anuttaraṁ,
etāni tīṇi cakkhūni akkhāsi purisuttamo, [1]
maṁsacakkhussa uppādo maggo dibbassa cakkhuno,
yato ñāṇaṁ udapādi paññācakkhu anuttaraṁ,
tassa cakkhussa paṭilābhā sabbadukkhā pamuccatī” ti. [2]
ayam-pi attho vutto bhagavatā, iti me sutan-ti.