Itivuttakapāḷi

3. 4. 5. Bahujanahitasuttaṁ (84)

[BJT Page 424]

vuttaṁ hetaṁ bhagavatā, vuttam-arahatā ti me sutaṁ:

“tayome bhikkhave BJT Note: bhikkhave is not seen in some books. puggalā loke uppajjamānā uppajjanti bahujanahitāya bahujanasukhāya lokānukampāya atthāya hitāya sukhāya devamanussānaṁ. katame tayo?

idha bhikkhave tathāgato loke uppajjati arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā. so dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāseti. ayaṁ bhikkhave paṭhamo puggalo loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussānaṁ.

puna caparaṁ bhikkhave tasseva satthusāvako arahaṁ hoti khīṇāsavo vusitavā katakaraṇiyo ohitabhāro anuppattasadattho parikkhīṇabhavasaññojano Editor’s note: BJT prints parikkhīṇabhavasaṁyojano, against its normal practice. sammad-aññā vimutto. so dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāseti. ayaṁ bhikkhave dutiyo puggalo loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussānaṁ.

puna caparaṁ bhikkhave tasseva satthusāvako sekho hoti paṭipado bahussuto sīlavatupapanno. so pi dhammaṁ deseti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāseti. ayaṁ bhikkhave tatiyo puggalo loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussānan”-ti.

[BJT Page 426]

etam-atthaṁ bhagavā avoca, tatthetaṁ iti vuccati:

−−⏑−¦−,⏑⏑¦−⏑−− Tuṭṭhubha x 4
“satthā hi loke paṭhamo mahesī,

−−⏑−,¦−⏑−¦−⏑−−
tassanvayo sāvako bhāvitatto,

⏑−⏑−,¦−⏑⏑¦−⏑−−
athāparo pāṭipado pi sekho,

⏑−⏑−,¦−⏑⏑¦−⏑−−
bahussuto sīlavatūpapanno. [1]

−−⏑−,¦−⏑⏑¦−⏑−− Tuṭṭhubha x 4
ete tayo devamanussaseṭṭhā,

⏑−⏑−,¦−⏑⏑¦−⏑−−
pabhaṅkarā dhammamudīrayantā,

⏑−⏑−¦⏑,⏑⏑¦−⏑−−
apāpuranti amatassa dvāraṁ,

−−⏑−¦−⏑,⏑¦−⏑−−
yogā pamocenti bahujjane te. [2]

−−⏑−¦−⏑,⏑¦−⏑−− Tuṭṭhubha x 3
ye satthavāhena anuttarena,

⏑−⏑−,¦−⏑⏑¦−⏑−−
sudesitaṁ maggam-anukkamanti,

⏑−⏑−¦−⏑,⏑¦−⏑−−
idheva dukkhassa karonti antaṁ,

−−⏑−¦−,⏑⏑¦−⏑−⏑− Jagatī
ye appamattā sugatassa sāsane” ti. [3]

ayam-pi attho vutto bhagavatā, iti me sutan-ti.

 

last updated: August 2007