Itivuttakapāḷi
3. 4. 7. Dhammānudhammapaṭipannasuttaṁ (86)
vuttaṁ hetaṁ bhagavatā, vuttam-arahatā ti me sutaṁ:
“dhammānudhammapaṭipannassa bhikkhuno ayam-anudhammo hoti veyyākaraṇāya dhammānudhammapaṭipanno yan-ti, bhāsamāno dhammañ-ñeva bhāsati no adhammaṁ, vitakkayamāno vā dhammavitakkañ-ñeva vitakketi no adhammavitakkaṁ. tad-ubhayaṁ abhinivajjetvā upekkhako viharati sato sampajāno” ti.
etam-atthaṁ bhagavā avoca, tatthetaṁ iti vuccati:
“dhammārāmo dhammarato dhammaṁ anuvicintayaṁ,
dhammaṁ anussaraṁ bhikkhu saddhammā na paribhāyati. [1]
caraṁ vā yadi vā tiṭṭhaṁ nisinno uda vā sayaṁ,
ajjhattaṁ samayaṁ cittaṁ santim-evādhigacchatī” ti. [2]
ayam-pi attho vutto bhagavatā, iti me sutan-ti.