Itivuttakapāḷi

4. 1. 8. Bahukārasuttaṁ (107)

vuttaṁ hetaṁ bhagavatā, vuttam-arahatā ti me sutaṁ:

“bahukārā bhikkhave brāhmaṇagahapatikā tumhākaṁ ye te paccupaṭṭhitā cīvarapiṇḍapātasenāsanagilānapaccayabhesajjaparikkhārehi. tumhe pi bhikkhave bahupakārā Editor’s note: BJT reads bahūpakārā, a printer’s error. brāhmaṇagahapatikānaṁ yaṁ nesaṁ dhammaṁ desetha ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāsetha. evam-idaṁ bhikkhave aññam-aññaṁ nissāya brahmacariyaṁ vussati oghassa nittharaṇatthāya sammā dukkhassa antakiriyāyā” ti.

etam-atthaṁ bhagavā avoca, tatthetaṁ iti vuccati:

−−−⏑¦−−−−¦¦⏑−−−¦⏑−⏑−
“sāgārā anāgārā ca ubho aññoññanissitā,

−−⏑−¦⏑−−−¦¦−−−−¦⏑−⏑−
ārādhayanti saddhammaṁ yogakkhemaṁ anuttaraṁ. [1]

−−−⏑¦⏑−⏑−¦¦−⏑−⏑¦⏑−⏑− Anuṭṭhubha
sāgāresu ca cīvaraṁ paccayaṁ sayanāsanaṁ,

⏑−−−¦⏑−−−¦¦⏑−⏑⏑¦⏑−⏑−
anāgārā paṭicchanti parissayavinodanaṁ. [2]

⏑⏑−⏑¦⏑−−−¦¦⏑−−⏑¦⏑−⏑−
sugataṁ pana nissāya gahaṭṭhā gharam-esino,

−⏑−−¦⏑⏑⏑−¦¦−⏑−−¦⏑−⏑− navipulā
saddahāno arahataṁ ariyapaññāya jhāyino. [3]

⏑⏑−−¦⏑−−−¦¦−−⏑⏑¦⏑−⏑−
idha dhammaṁ caritvāna maggaṁ sugatigāminaṁ,

−⏑−−¦⏑−−−¦¦−−⏑−¦⏑−⏑−
nandino devalokasmiṁ modanti kāmakāmino” ti. [4]

ayam-pi attho vutto bhagavatā, iti me sutan-ti.

 

last updated: August 2007