Itivuttakapāḷi

4. 1. 10. Purisapiyarūpasuttaṁ (109)

vuttaṁ hetaṁ bhagavatā, vuttam-arahatā ti me sutaṁ:

“seyyathā pi bhikkhave puriso nadiyā sotena ovuyheyya piyarūpasātarūpena. tam-enaṁ cakkhumā puriso tīre ṭhito disvā evaṁ vadeyya: “kiñcāpi kho tvaṁ ambho purisa nadiyā sotena ovuyhasi piyarūpasātarūpena, attha cettha heṭṭhā rahado saūmī sāvaṭṭo sagaho sarakkhaso, yaṁ tvaṁ ambho purisa pāpuṇitvā maraṇaṁ vā nigacchasi maraṇamattaṁ vā dukkhan”-ti. atha kho so bhikkhave puriso tassa purisassa saddaṁ sutvā hatthehi ca pādehi ca paṭisotaṁ vāyameyya.

[BJT Page 474]

upamā kho me ayaṁ bhikkhave katā atthassa viññāpanāya. ayam-ettha attho: “nadiyā soto” ti kho bhikkhave taṇhāyetaṁ adhivacanaṁ; “piyarūpasātarūpan”-ti kho bhikkhave channetaṁ ajjhattikānaṁ āyatanānaṁ adhivacanaṁ; “heṭṭhā rahado” ti kho bhikkhave pañcannaṁ orambhāgiyānaṁ saṁyojanānaṁ adhivacanaṁ; “saūmī” ti kho bhikkhave kodhūpāyāsassetaṁ adhivacanaṁ; “sāvaṭṭo” ti kho bhikkhave pañcannetaṁ kāmaguṇānaṁ adhivacanaṁ; “sagaho sarakkhaso” ti kho bhikkhave mātugāmassetaṁ adhivacanaṁ; “paṭisoto” ti kho bhikkhave nekkhammassetaṁ adhivacānaṁ; “hatthehi ca pādehi ca vāyāmo” ti kho bhikkhave viriyārambhassetaṁ adhivacanaṁ; “cakkhumā puriso tīre ṭhito” ti kho bhikkhave tathāgatassetaṁ adhivacanaṁ arahato sammāsambuddhassā” ti.

etam-atthaṁ bhagavā avoca, tatthetaṁ iti vuccati:

⏑−⏑−¦−⏑,⏑¦−⏑−− Tuṭṭhubha x 5
“sahāpi dukkhena jaheyya kāme,

−−−−,¦−⏑−¦−⏑−− Metre: Notice the opening in this line, which is a variation common in the Vedic period and in the very early suttas.
yogakkhemaṁ āyatiṁ patthayāno, BJT Note: patthamāno - Palm leaf book, Printed book.
−−⏑−¦−,⏑⏑¦−⏑−−
sammappajāno suvimuttacitto,

⏑−⏑−,¦−⏑−¦−⏑−−
vimuttiyā phassaye tattha tattha,

⏑−⏑−,¦⏑⏑⏑¦−⏑−−
sa vedagū vusitabrahmacariyo,

−−⏑−,¦−⏑⏑−¦⏑−⏑− Jagatī
lokantagū pāragato ti vuccatī” ti. [1]

ayam-pi attho vutto bhagavatā, iti me sutan-ti.

 

last updated: August 2007