(Aniyatuddeso)

[BJT Vol I, Page 484]

ime kho panāyasmanto dve aniyatā dhammā uddesaṁ āgacchanti.

[BJT Vol I, Page 486]

Aniy 1: Paṭhama-aniyatasikkhāpadaṁ

yo pana bhikkhu mātugāmena saddhiṁ eko ekāya raho paṭicchanne āsane alaṅkammaniye nisajjaṁ kappeyya. tam-enaṁ saddheyyavacasā upāsikā disvā tiṇṇaṁ dhammānaṁ aññatarena vadeyya: pārājikena vā saṅghādisesena vā pācittiyena vā. nisajjaṁ bhikkhu paṭijānamāno tiṇṇaṁ dhammānaṁ aññatarena kāretabbo: pārājikena vā saṅghādisesena vā pācittiyena vā. yena vā sā saddheyyavacasā upāsikā vadeyya, tena so bhikkhu kāretabbo. ayaṁ dhammo aniyato.

[BJT Vol I, Page 492]

Aniy 2: Dutiya-aniyatasikkhāpadaṁ

na heva kho pana paṭicchannaṁ āsanaṁ hoti nālaṅkammaniyaṁ. alañ-ca kho hoti mātugāmaṁ duṭṭhullāhi vācāhi obhāsituṁ. yo pana bhikkhu tathārūpe āsane mātugāmena saddhiṁ eko ekāya raho nisajjaṁ kappeyya. tam-enaṁ saddheyyavacasā upāsikā disvā dvinnaṁ dhammānaṁ aññatarena vadeyya saṅghādisesena vā pācittiyena vā. nisajjaṁ bhikkhu paṭijānamāno dvinnaṁ dhammānaṁ aññatarena kāretabbo saṅghādisesena vā pācittiyena vā. yena vā sā saddheyyavacasā upāsikā vadeyya, tena so bhikkhu kāretabbo. ayam-pi dhammo aniyato.

[BJT Vol I, Page 496]

uddiṭṭhā kho āyasmanto dve aniyatā dhammā.

tatthāyasmante pucchāmi: kaccittha parisuddhā?
dutiyam-pi pucchāmi: kaccittha parisuddhā?
tatiyam-pi pucchāmi: kaccittha parisuddhā?
parisuddhetthāyasmanto, tasmā tuṇhī, evam-etaṁ dhārayāmi.

(Aniyatuddeso niṭṭhito)