(Nissaggiyapācittiyā - 1-10)

[BJT Vol I, Page 498]

ime kho panāyasmanto tiṁsa nissaggiyā pācittiyā dhammā uddesaṁ āgacchanti.

[BJT Vol I, Page 500]

NP 1: Paṭhamakaṭhinasikkhāpadaṁ

niṭṭhitacīvarasmiṁ bhikkhunā ubbhatasmiṁ kaṭhine, dasāhaparamaṁ atirekacīvaraṁ dhāretabbaṁ. taṁ atikkāmayato, nissaggiyaṁ pācittiyaṁ.

[BJT Vol I, Page 504]

NP 2: Dutiyakaṭhinasikkhāpadaṁ

niṭṭhitacīvarasmiṁ bhikkhunā ubbhatasmiṁ kaṭhine, ekarattam-pi ce bhikkhu ticīvarena vippavaseyya, aññatra bhikkhusammutiyā, nissaggiyaṁ pācittiyaṁ.

[BJT Vol I, Page 512]

NP 3: Tatiyakaṭhinasikkhāpadaṁ

niṭṭhitacīvarasmiṁ bhikkhunā ubbhatasmiṁ kaṭhine, bhikkhuno paneva akālacīvaraṁ uppajjeyya. ākaṅkhamānena bhikkhunā paṭiggahetabbaṁ, paṭiggahetvā khippam-eva kāretabbaṁ. no cassa pāripūri, māsaparamaṁ tena bhikkhunā taṁ cīvaraṁ nikkhipitabbaṁ ūnassa pāripūriyā, satiyā paccāsāya. tato ce uttariṁ nikkhipeyya, satiyā pi paccāsāya, nissaggiyaṁ pācittiyaṁ.

[BJT Vol I, Page 518]

NP 4: Purāṇacīvarasikkhāpadaṁ

yo pana bhikkhu aññātikāya bhikkhuniyā purāṇacīvaraṁ dhovāpeyya vā rajāpeyya vā ākoṭāpeyya vā, nissaggiyaṁ pācittiyaṁ.

[BJT Vol I, Page 524]

NP 5: Cīvarapaṭiggahaṇasikkhāpadaṁ

yo pana bhikkhu aññātikāya bhikkhuniyā hatthato cīvaraṁ paṭiggaṇheyya, aññatra pārivaṭṭakā, nissaggiyaṁ pācittiyaṁ.

[BJT Vol I, Page 530]

NP 6: Aññātakaviññattisikkhāpadaṁ

yo pana bhikkhu aññātakaṁ gahapatiṁ vā gahapatāniṁ vā cīvaraṁ viññāpeyya, aññatra samayā, nissaggiyaṁ pācittiyaṁ.

tatthāyaṁ samayo: acchinnacīvaro vā hoti bhikkhu naṭṭhacīvaro vā - ayaṁ tattha samayo.

[BJT Vol I, Page 534]

NP 7: Tatuttarisikkhāpadaṁ

tañ-ce aññātako gahapati vā gahapatānī vā bahūhi cīvarehi abhihaṭṭhuṁ pavāreyya, santaruttaraparamaṁ tena bhikkhunā tato cīvaraṁ sāditabbaṁ. tato ce uttariṁ BJT note: uttari - ChS. sādiyeyya, nissaggiyaṁ pācittiyaṁ.

[BJT Vol I, Page 536]

NP 8: Paṭhama-upakkhaṭasikkhāpadaṁ

bhikkhuṁ paneva uddissa aññātakassa gahapatissa vā gahapatāniyā vā cīvaracetāpannaṁ BJT note: cīvaracetāpanaṁ - Thai. upakkhaṭaṁ hoti: “iminā cīvaracetāpannena cīvaraṁ cetāpetvā itthannāmaṁ bhikkhuṁ cīvarena acchādessāmī” ti. tatra ce so bhikkhu pubbe appavārito upasaṅkamitvā cīvare vikappaṁ āpajjeyya: “sādhu vata maṁ āyasmā iminā cīvaracetāpannena evarūpaṁ vā evarūpaṁ vā cīvaraṁ cetāpetvā acchādehī” ti. kalyāṇakamyataṁ upādāya, nissaggiyaṁ pācittiyaṁ.

[BJT Vol I, Page 542]

NP 9: Dutiya-upakkhaṭasikkhāpadaṁ

bhikkhuṁ paneva uddissa ubhinnaṁ aññātakānaṁ gahapatīnaṁ vā gahapatānīnaṁ vā paccekacīvaracetāpannā upakkhaṭā honti: “imehi mayaṁ paccekacīvaracetāpannehi paccekacīvarāni cetāpetvā itthannāmaṁ bhikkhuṁ cīvarehi acchādessāmā” ti. tatra ce so bhikkhu pubbe appavārito upasaṅkamitvā cīvare vikappaṁ āpajjeyya: “sādhu vata maṁ āyasmanto imehi paccekacīvaracetāpannehi evarūpaṁ vā evarūpaṁ vā cīvaraṁ cetāpetvā acchādetha ubho va santā ekenā” ti. kalyāṇakamyataṁ upādāya, nissaggiyaṁ pācittiyaṁ.

[BJT Vol I, Page 548]

NP 10: Rājasikkhāpadaṁ

bhikkhuṁ paneva uddissa rājā vā rājabhoggo vā brāhmaṇo vā gahapatiko vā dūtena cīvaracetāpannaṁ pahiṇeyya: “iminā cīvaracetāpanena cīvaraṁ cetāpetvā itthannāmaṁ bhikkhuṁ cīvarena acchādehī” ti. so ce dūto taṁ bhikkhuṁ upasaṅkamitvā evaṁ vadeyya: “idaṁ kho bhante āyasmantaṁ uddissa cīvaracetāpannaṁ ābhataṁ, paṭiggaṇhātu Editor’s note: BJT, patiggaṇh- here, but paṭiggaṇh- in NP5 above. āyasmā cīvaracetāpannan”-ti. tena bhikkhunā so dūto evam-assa vacanīyo: “na kho mayaṁ āvuso cīvaracetāpannaṁ paṭiggaṇhāma cīvarañ-ca kho mayaṁ paṭiggaṇhāma kālena kappiyan”-ti. so ce dūto taṁ bhikkhuṁ evaṁ vadeyya: “atthi panāyasmato koci veyyāvaccakaro” ti. cīvaratthikena bhikkhave bhikkhunā veyyāvaccakaro niddisitabbo ārāmiko vā upāsako vā: “eso kho āvuso bhikkhūnaṁ veyyāvaccakaro” ti. so ce dūto taṁ veyyāvaccakaraṁ saññāpetvā taṁ bhikkhuṁ upasaṅkamitvā evaṁ vadeyya: “yaṁ kho bhante āyasmā veyyāvaccakaraṁ niddisi, saññatto so mayā. upasaṅkamatu āyasmā kālena, cīvarena taṁ acchādessatī” ti. cīvaratthikena bhikkhave bhikkhunā veyyāvaccakaro upasaṅkamitvā dvattikkhattuṁ codetabbo sāretabbo: “attho me āvuso cīvarenā” ti. dvattikkhattuṁ codayamāno sārayamāno taṁ cīvaraṁ abhinipphādeyya, iccetaṁ kusalaṁ. no ce abhinipphādeyya, catukkhattuṁ pañcakkhattuṁ chakkhattuṁ paramaṁ tuṇhībhūtena uddissa ṭhātabbaṁ. catukkhattuṁ pañcakkhattuṁ chakkhattuṁ paramaṁ tuṇhībhūto uddissa tiṭṭhamāno taṁ cīvaraṁ abhinipphādeyya, iccetaṁ kusalaṁ. tato ce uttariṁ vāyamamāno taṁ cīvaraṁ abhinipphādeyya, nissaggiyaṁ pācittiyaṁ.

no ce abhinipphādeyya, yatassa cīvaracetāpannaṁ ābhataṁ tattha sāmaṁ vā gantabbaṁ dūto vā pāhetabbo: “yaṁ kho tumhe āyasmanto bhikkhuṁ uddissa cīvaracetāpannaṁ pahiṇittha, na taṁ tassa bhikkhuno kiñci atthaṁ anubhoti, yuñjantāyasmanto sakaṁ, mā vo sakaṁ vinassā” ti. ayaṁ tattha sāmīci.

Cīvaravaggo paṭhamo

[BJT Vol I, Page 554]

last updated: March 2006