Dhammatthavinicchayo

Buddhatthā

30. Catasso Paṭisambhidāyo

from Milindapañho, 4.1

Catasso kho, mahārāja, paṭisambhidāyo:

1. Atthapaṭisambhidā,
2. dhammapaṭisambhidā,
3. niruttipaṭisambhidā,
4. paṭibhānapaṭisambhidā ti.

1. Yo koci maṁ atthapaṭisambhide pañhaṁ pucchissati,

tassa atthena atthaṁ kathayissāmi,
kāraṇena kāraṇaṁ kathayissāmi,
hetunā hetuṁ kathayissāmi,
nayena nayaṁ kathayissāmi,
nissaṁsayaṁ karissāmi,

vimatiṁ vivecessāmi, tosayissāmi pañhaveyyākaraṇena.

2. Yo koci maṁ dhammapaṭisambhide pañhaṁ pucchissati,

tassa dhammena dhammaṁ kathayissāmi,
amatena amataṁ kathayissāmi,
asaṅkhatena asaṅkhataṁ kathayissāmi,
nibbānena nibbānaṁ kathayissāmi,
suññatena suññataṁ kathayissāmi,
animittena animittaṁ kathayissāmi,
appaṇihitena appaṇihitaṁ kathayissāmi,
anejena anejaṁ kathayissāmi,
nissaṁsayaṁ karissāmi,

vimatiṁ vivecessāmi, tosayissāmi pañhaveyyākaraṇena.

3. Yo koci maṁ niruttipaṭisambhide pañhaṁ pucchissati,

tassa niruttiyā niruttiṁ kathayissāmi,
padena padaṁ kathayissāmi,
anupadena anupadaṁ kathayissāmi,
akkharena akkharaṁ kathayissāmi,
sandhiyā sandhiṁ kathayissāmi,
byañjanena byañjanaṁ kathayissāmi,
anubyañjanena anubyañjanaṁ kathayissāmi,
vaṇṇena vaṇṇaṁ kathayissāmi,
sarena saraṁ kathayissāmi,
paññattiyā paññattiṁ kathayissāmi,
vohārena vohāraṁ kathayissāmi,
nissaṁsayaṁ karissāmi,

vimatiṁ vivecessāmi, tosayissāmi pañhaveyyākaraṇena.

4. Yo koci maṁ paṭibhānapaṭisambhide pañhaṁ pucchissati,

tassa paṭibhānena paṭibhānaṁ kathayissāmi,
opammena opammaṁ kathayissāmi,
lakkhaṇena lakkhaṇaṁ kathayissāmi,
rasena rasaṁ kathayissāmi,
nissaṁsayaṁ karissāmi,

vimatiṁ vivecessāmi, tosayissāmi pañhaveyyākaraṇena.

last updated: December 2016